104 年全國語文競賽原住民族語朗讀【賽夏語】 國小學生組 編號 1 號
noka kawaS kapanra:anan

naba:an naka kamatal’izaeh. ’oem’oemaeh ’ima ’ana kano’ ma’ ’oka’. siya mowa:i’ m’altikal ka SaSapel, ’ima hes’ezan o ’ima sopaloy, hoba:angen ka rineme: pongaehpongaehan ila. hayza’ ka ’ima ngangilaehan, ’ima bolalasan, ’ima habiyalan. papa:o’ somapih ka kayba:en ’ima kayzaeh kita’en, homhomayap a homhomiyong mam Siyae’. kita’en ’ima mehes ka kaehoy, nisiya papabasezen naehan, temne’ ila. ’oemaeh ’i’iyaeh ila, hayza’ ila ka wa’is. ’ana hiya’ komita’ ka ’oem’oemaeh ma’ kayzaeh ila ka hina’azem, naka pongaeh ray ka:ra’ minpongpongaeh ila. kabkabaehae: mowa:i’ ma:tol, SibSiba:i’ ma’ mowa:i’ ma’onhael. nasiya hinngas naka binbiniSitan tatono’ kakalingking, ma’an bazae’en naka tatini’ raroton mam kiSba:aw.

So: potngor ila haba:an naka hapoy Sinahoe’, bazae’en rikrika: a tomalan. ’isahini So: hayza’ ka hahola’ ho’molen, naka biyas poralomon ila. mita’ basang a hina’azem noka hahola’ ’ana ’ititi’an ma’ pak’iya’zawen ila, ’ima rikrika: hawka’ ila. haba:an mak’aehae’ ma’ maraS ka ba:i’ ki ’a’oral mowa:i’. So: ba:yoS ila, hinohaes noka ’a’oral baehi’baehi’in. ’ima maSna’abe’ bazae’en naka kamamalahang ka ’a’oral samiyan mam ma:tol a mam homlal.

na’amiSan naka kamahomoba:ang, noka rae:ae’ biyae’ reme:en pakngangilaehan. pazay  ’ima  ’as’asay  pakhabiyalan ila;  ma’  homoba:ang  ka kabkabaehae: ’inay ra:waS mowa:i’, ’ana heheb ila ma’ haysiya mam homayap, hikor hayza’ ka hahila: kayzaeh kita’en. na’amiSan ma’ naka ’ima makakreng ka kamatal’oemaeh, ’akoey ka pinamowa’ minpongaeh, minboway ila. ’isahini ’ana hiya’ ma’ hayza’ ka ka kipazayen, hakhakhak Siyae’ a tomal.

hinohaes haba:i’in bebebe: bazae’en ila. yako ra:am ’amiSan potngor ila. ’amiSan naka korkoring haSa’ honasamez. siya mari’ ka kakato: kome:eb ka kaehoy, ’ana ’aehae’ biyae’ ma’ ’oka’ ila, panga’ ila nanaw, naka ’ima po’ih kita’en. ma’ mari’ ka rareme: Sisa:ah, ’ana hayno’ ma’ hayza’. hahila: mak’aehae’ hoShoSa:il mam makakSiyae ki siya, maskes a tomalan.  

Sopat noka kawaS pinanra:anan kayzaeh a tomalan saboeh. ’ana ’aehae’ ’aehae’ ’okik hingha’ hayza’ ka ’ima kayzaeh, ma’ hayza’ ka ’ima ’aewhay; ’oka’ o So: ra:am taniSowaw ka pinanra:anan noka hahila:, ’isa:a’ ’ana ’inowan ma’ hayza’ ka ’ima kayzaeh ka kin’i’iyaeh, ma’ ’am Siyae’ a tomal.

104 年全國語文競賽原住民族語朗讀【賽夏語】 國小學生組 編號 1 號
四季

春天像是一個藝術家,原本空無一物的大地,他鋪上一條大大的綠毯子,再畫上五顏六色的花朵,有紅色、白色、黃色。蝴蝶穿上美麗的衣裳,快樂的翩翩飛舞,原本枯萎的樹木,再次萌芽,讓世界變得更有生機,使人們的心情也都好起來。小鳥們前來歌唱,昆蟲也來,發出像瓶子敲擊聲叮叮噹噹的聲音,好像老人家在唱古謠呢

當夏季來臨,天氣就會熱的像火一樣,此時含一口冰棒,就像失火時要用水來消火,人的身心就會因為冰棒,使暑氣全消。夏天有時還是個隨著風雨而來的精靈,每當颱風來襲時,窗戶總被雨水洗淨,嘩啦嘩啦的雨聲,如同雨神在歌唱跳舞一般。

秋天就像一名畫家,會把楓葉染成橘紅色;還會把飽滿的稻穗轉變成像金光閃閃的金黃色,遠道而來的候鳥來襯托夕陽的美麗,秋天也是一個勤勞的農夫,讓許多的植物開花結果,使人們能夠有收穫,帶給大家很多的歡樂。

窗外有北風呼呼的吹,就知道一定是冬天來了。冬天像個頑裡,總喜歡到處搗蛋,他用剪刀把樹上的葉子全部剪光,只留下了光禿禿的樹幹,還把白色的油漆倒的滿地都是,還會和太陽公公玩捉迷藏,把世界變得好冷好冷。

四季的春夏秋冬都是美好的季節,雖然每個季節都有優缺點,但如果懂得如何享受四季,那麼四季都會是充滿歡笑的喔!

文章資訊

族語標題noka kawaS kapanra:anan
漢語標題四季
文章編號1
文章年度104
文章組別國小
文章語別賽夏語
最後更新2015-08-27 17:12:48
平均評等尚未評等
我的評等尚未評等

意見討論區