106 年全國語文競賽原住民族語朗讀【賽夏語】 國中學生組 編號 3 號
yako SaySiyat

kamatortoroe’ somingozaw Sa’, “ ’ampowa’ So’o Sin kas’amesen Sinrahoe’? ” ya:o tiSkobae:oh, “ yako SaySiyat ”. ma’an kinra:am ka SaySiyat a Sinrahoe’ ’ima maynonak, ’inaray kasnay’oes’oeso’an, hinbetbetelan kaehoy , kawaS kinita’an rino:o’, ma’ hayza’ kama pa’owaz Sinrahoe’ ’aza’, ’omowaz ka SaySiyat a kaSpengan.

noka SaySiyat Sinrahoe’ hayza’-- titiyon, baba:i’, Sa:wan, kas’ames, kaybaybaw, tawtawazay, minrakeS, tataysi’, hayawan, karkarang, Sayna’ase:, tanohila:, kamlala:i’, botbotol, hayza’ roSa’ Sinrahoe’ karkaramo’ ki tabtabilaS hawka’ ila.

SaySiyat ’ima tani yaba’ a kino’asangan, kamamanra:an ’o’owa’ ’ima hinbasez koSa’en rompa: ka boehoe:, SikoSa’ parpa: ila ’aehae’ kama’alep ki nom papanae’ wa’is. So: minatini’ a tomal kamamanra:an, taSilotor ka ’in baki’ a raro:o’, hikor porotor ka ’inyaba’a raro:o’, nak So: baki’ Sin’itihin, yaba’ Sin ta:oson, tatama’ ’o’owa’ Si ro:o’ ’itih a ta:os, minayti’ mari’ ila ka ’in baki’a Sapang ’aehael o ’ima langi: tatini’ a raro:o’.

minkoringan ’o’owa’ hinbasez koSa’en kama lihapoy(talsapal ka minahael), Si koSa’ hiza’ ’o’owa’ mayhal nom pama’ ray kin’i’iyaeh kankano’ howaw, ti’ti’oe:oe’, komaehoy, tomalek pakbaba:ok, Somahoe’ pakrikrika: ka ’aehae’ taew’an, minkoringan a kak’i’iyaeh nak ’abo’ kin hororay. So: minatini’ a tomal minkoringan, mari’ ka ’in koko’a raro:o’, hingha’ porotor ka ’in yaba’ a raro:o’, koko’ Sin ’okayen, yaba’ Sin kalihin, Si ro:o’ ’okay a kalih, minayti’ mari’ ila ka ’in baki' a Sapang ’aehael o ma langi: ila tatini’ a raro:o’, hinra:iy tabin tatini’ ma’ ’okik sapih ka raro:o’.

kakhayza’an ray ’asang So: mae’iyaeh somingozaw Sa’, “ So’o hiya? ” panabihin ka ’in yaba’a raro:o’, baki’ hiya’, koko’ hiya’, kano’ Sinrahoe’, ma’ ra:am ila So’o ’in hiya’a korkoring, Say ’ino’ mae’iyaeh. ’isahini ila, ’ana haysiya tani kaspengan Sinrahoe’ ki raro:o’, maySoSo:aw manogwip ila ka “ ramo’ ki kaehma’ ”, So’o hiya’ a tomal? haSa’ ila ka tatini’, ngota: ila ka ngabas, malnopizpiza’ ila ka SaySiyat a ka:i’, ’ana nak’hiza’, ’ihoero: a tomal ’asang nak’ino’ sin’elan, ’inay’ino’ ’ima mabasez, paksopaloy ka ’inoe’oe: “ yako SaySiyat ”.

106 年全國語文競賽原住民族語朗讀【賽夏語】 國中學生組 編號 3 號
我是賽夏族

「為何姓根?」

賽夏族姓氏獨特,以動物、植物、天文、自然現象為氏族名號,也有司祭姓氏,負責主持賽夏傳統祭儀。

賽夏姓氏有titiyon、baba:i’、Sa:wan、kas’ames、kaybaybaw、tawtawazay、minrakeS、tataysi’、hayawan、karkarang、Sayna’ase:、tanohila:、kamlala:i’、botbotol,有兩姓氏已消失。

男嬰出生意謂增添狩獵與戰鬥力量。長子承襲祖父名,聯結父親名,祖父名’itih,父親名ta:os,男娃即名為’itih a ta:os,次子之後則承其他叔伯輩直系或旁系名字。

女嬰的出生稱揹柴火者,負擔生活瑣事,採集、取薪柴,提供家庭火光熱力。長女承祖母名,聯結父親名,祖母名’okay,父親名kalih,女嬰名即為’okay a kalih,次女之後承姑輩直系或旁系名字,嫁人亦不改名。

若有人問起:「你是誰?」告訴他父親名字,祖父是誰,祖母是誰,什麼姓氏,也大都知道是哪裡人。現在雖沿用傳統姓氏和名字,只會說一點賽夏語。我們要記得從何而來,大聲說「我是賽夏族」。 

文章資訊

族語標題yako SaySiyat
漢語標題我是賽夏族
文章編號3
文章年度106
文章組別國中
文章語別賽夏語
文章作者朱瑞萍
漢語摘要
最後更新2019-04-29 14:18:50