106 年全國語文競賽原住民族語朗讀【賽夏語】 國小學生組 編號 4 號
ray ’ima ’inaro’ ka Sangayan

maSangay ila! yako ki minayti’ kamanra:an kinSiyae’ a tomal, yaba’ ki ’oya’ haysiya ’am matawaw, yaba’ Sa’, “ moyo roSa’ ray ’ima maSangay, ’az’azem naehan ’am kano’ kapatawawen, moyo ’aehae’ ’aehae’ ka:at ’ani, So: ya:o matawaw lobih ray taew’an takita’ ila, nimon kina:at kakano? ” yako ki minayti’ ma’an tiSkobae:oh hi yaba’ Sa’, “ ’a:ay! ” ’oya’ ray kabih ma’ somolong Sa’, “ moyo roSa’ kilwa’is ila, yami ’am rima’ ila matawaw, ray taew’an kalahang mina hi minayti’ ”.

ma’an ray ta’oeloeh ’i:zo’ ’oka’ ka hin’azem, minayti’ ray kabih ’om’omaybol hi ya:o ’am ma’az’azem, “ ’minatini’ minatini’ ’am nak’ino koma:at! ”, ma’an ’angangen “ ’iyahimi’! nonak ’az’azem naehan ’izi’ ’aybol ’iyakin ”, minayti’ hihi:mi’an ! nonak mari’ ka kina:at koma:at ila, ’okik honaenge: ni minayti’ kayzaeh ila kina:at, ma’an ma’ kayzaeh ila kina:at.

ma’an kina:at hayza’ minayhaseb kina:at, minay ’aehae’-- ya:o ’am ray taew’an tatilhaehael hi ’oya’ matawaw.

minay roSa’-- ya:o ’am rima’ tatoroe’ ka ’am lalangoy.

minay to:o-- ya:o ’am lobih ray ’oes’oeso’an komita’ hi baki’ ki koko’. minay Sopat-- ya:o niya ’inoSa’ kala: ’ata’ ma’an ray taew’an hoto taypae’, ray taypae’ hayza’ ’akoey ’ima ’okik hingha’ kapapama’an.

minay haseb-- ya:o ’ am ’omam’amoeh koma:at ka bine:ay ni kamatortoroe’ ka kina:at.

ni minayti’ kina:at roSa’ nanaw, minay ’aehae’-- ray taew’an homoba:ang ka kinmae’iyaehan ’ima ’angiS ni minatini’. komita’ ka hini yako sawa’ ila!

minay roSa’-- niya’ ’inoSa’ ray taypae’ komita’ ka Sinpanan.

yaba’ ’inay kapatawawan lobih ila, komita’ niya’om kina:at, mayaka:i’ hi yami’ roSa’ Sa’, “ So: moyo roSa’ ray taew’an makakreng matwaw nimon nonak ka patawawen, ray minaSangay ta’araS ila hi moyo’. ” yami roSa’ kiSiyae’ tomal, ’sa’sa’ih ka hahila: mayna:a’ hi ’oya’ ki yaba’ ’am maSangay, sa’owaz! yaba’ ki ’oya’ maraS hi yami rima’ manmanra:an.

hini ’aehae’ ka ’ima ’inaro’ ka Sangayan, yami roSa’ kinSiyae’ a tomal, Sekla’ ’akoey ka kinra:man, komita’ ’akoey ka ’ima ’okik hingha’ ka ’asang, ma’alo’ hi yaba’ ki ’oya’. 

106 年全國語文競賽原住民族語朗讀【賽夏語】 國小學生組 編號 4 號
漫長暑假

放假了!爸爸說:「你們放假期間想要做些什麼,一一列出來,我下班來看看。

我腦中沒有頭緒,弟弟不斷干擾我思考,被我罵:「安靜!別打擾我。」弟弟安靜地拿紙張寫了起來,沒多久我們都寫好了。

我寫下五項,一、我要幫忙做家事。二、我要去學(習)游泳。三、我要回山上看爺爺奶奶。四、我想去台北阿姨家。五、我要趕快完成作業。弟弟只寫了兩項,一、在家要畫哥哥凶悍的臉。二、想去台北動物園。

爸爸回來看見我們所寫的,便向我們說:「如果你們在家認真做好自己的工作,禮拜天就帶你們出去逛逛。」我們十分興奮,每天等著假日到來帶我們逛逛。

漫長暑假,我們非常愉快,吸收很多知識,也看見很多不一樣的部落,謝謝爸爸和媽媽。

文章資訊

族語標題ray ’ima ’inaro’ ka Sangayan
漢語標題漫長暑假
文章編號4
文章年度106
文章組別國小
文章語別賽夏語
文章作者朱瑞萍
漢語摘要
最後更新2019-04-29 14:21:07